သင်ထၢမ်ၶဝ်ဝႃႈၸုမ်းသူၸဝ်ႈၼႆႉႁဵတ်းသင်ယူႇၼႆၸိုင်ၶဝ်ၵေႃႈတေတွပ်ႇလၢတ်ႈဝႃႈၶဝ်ႁဵတ်းၵၢၼ်ပုၼ်ႈတႃႇၸိူဝ်ႉၸၢတ်ႈဝၢၼ်ႈမိူင်း ၸွႆႈၵႅတ်ႇၶေႁေႉၵင်ႈပၼ်ၽေးၶဵၼ်ပေႃႈႄမႈၵူၼ်းမိူင်းၼႆယူႇ
ၵူၺ်းၵႃႈလၢႆးဢၼ်ၶဝ်ႁဵတ်းယူႇယၢမ်းလဵဝ်ၼႆႉသမ်ႉပိၼ်ၽူၼ်ဝႆႉ ဢမ်ႇမိူၼ်ၼင်ဢၼ်ၶဝ်လၢတ်ႈၼၼ်ႉသေဢိတ်း သေဢမ်ႇၵႃးသမ်ႉၶႅၼ်ၼႃႈတီႈတေႃႇတႆးၼင်ႇၵၼ် ၸွမ်းသွၵ်ႈတဝ်တီႉၺွပ်းဢဝ်တၢႆ ၵူၼ်းၸိူဝ်းဢွၼ်ႁူဝ်ႁဵတ်းၵၢၼ်ၼႂ်းတူင်ႇဝူင်း ၸွမ်းဝၢၼ်ႈ ၼႂ်းပွၵ်ႉ ၼႂ်းဢိူင်ႇ သေၸီႉၼေးဝႃႈပဵၼ်ၵူၼ်းၸပ်းၽၢၵ်ႇၼႆသေဢဝ်တၢႆမိူၼ်ဢမ်ႇၸႂ်ႈၵူၼ်းၼႂ်းသၢႆလိူတ်ႈတႆးၼင်ႇၵၼ်။
ၸုမ်းၶဝ်မၢၵ်းမၼ်ႈတႆးၸုမ်းၼိုင်ႈပဵၼ်ၽူႈၶဵၼ်ၶဝ်သေ ႁူမ်ႈႁွမ်းၸွမ်းၸုမ်းၵူၼ်းၼွၵ်ႈၶိူဝ်း မိူၼ်ၼင်ႇၸုမ်းသိုၵ်းဝ ၸုမ်းသိုၵ်းပလွင်ႈ ၸုမ်းသိုၵ်းမႃႇႁႃႇမိၵ်ႉပွတ်းႁွင်ႇဢၼ်သိုၵ်းဝၶဝ်ဢွၼ်ႁူဝ်ၼၼ်ႉသေၸွမ်းပၢၼ်းၽိတ်းတႆးၼင်ႇၵၼ် ၶႅၼ်ၼႃႈတီႈတေႃႇတႆးၼင်ႇၵၼ် သေဢဝ်ပိူၼ်ႈပဵၼ်ယႂ်ႇလိူဝ်သေၵူၼ်းၶိူဝ်းတႆးၼင်ႇၵၼ်ၸွမ်းလိုပ်ႈၸွမ်းတိုၵ်းသိုၵ်းတႆးၼင်ႇၵၼ်။
ၸုမ်းၶဝ်ပွႆႈပၼ်ႁႂ်ႈၸုမ်းဢူၺ်းလီၶဝ် ၵဵပ်းၶွၼ်ႇ ၵဵပ်းသိုၵ်း လွၵ်ႇငိုတ်ႈပေႉၵိၼ်ၵူၼ်းၶိူဝ်းလဵဝ်ၵၼ်သေႁူမ်ႇတူမ်းပၼ်လွၵ်ႈမိူၵ်ႈလိူင်းၸုမ်းဢူၺ်းလီၶဝ် ဢၼ်ႁဵတ်းတေႃႇၵူၼ်းၶိူဝ်းတႆး ၊ ၸုမ်းၶဝ်ႁွင်ႉဢဝ်ဢူၺ်းလီၶဝ်သေႁႅၼ်းသိုၵ်းလေႃႇတိုၵ်းသိုၵ်းတႆးၼင်ႇၵၼ် မၢပ်ႇၼေးဝႃႈပူၼ်ႉပႅၼ်ၼႃႈတီႈ ဝႃႈၼႃႈတီႈၶဝ်ယူႇတၢင်းပွတ်းၸၢၼ်း သေပူၼ်ႉပႅၼ်မႃးပွတ်းႁွင်ႇဝႃႈၼႆ။
ၸုမ်းၶဝ်လၢတ်ႈဝႃႈၼႃႈတီႈတႆးႁဝ်းသွင်ၸုမ်းသွၼ်ႉၵၼ်လႄႈဢမ်ႇၶႂ်ႈႁႂ်ႈၵူၼ်းမိူင်းလႆႈတုၵ်ႉၶ ဢမ်ႇၶႂ်ႈႁႂ်ႈၵူၼ်းမိူင်းလႆႈႁၢပ်ႇလၢႆမႃႇလၢႆၵၢၼ်း ၼႆသေတုၵ်းယွၼ်းႁႂ်ႈထွႆဢွၵ်ႇၼႂ်းပိုၼ်ႉတီႈဢၼ်သွၼ်ႉၵၼ်ၼႆႉၼႆယူႇ။
ၵူၺ်းၵႃႈဢၼ်ၸုမ်းသိုၵ်းလွႆ သိုၵ်းၶၢင် သိုၵ်းၵဝ်ႈၵၢင်ႉ ၶဝ်ပူၼ်ႉပႅၼ်ၶဝ်ယူႇၼႂ်းၼႃႈတီႈၶဝ်ၼၼ်ႉသေၵဵပ်ႇၵွၼ်ၶွၼ်ႇတီႈၵူၼ်းၸၢဝ်းၶိူဝ်းတႆး တဵၵ်းၶၢၼ်းဢဝ်ၵူၼ်းၶိူဝ်းတႆးၵႂႃႇႁဵတ်းသိုၵ်းၶဝ် ၸိူဝ်းၼႆႉၸုမ်းၶဝ်ဢမ်ႇႁတ်းတၵ်းသဵင် ဢမ်ႇႁတ်းလၢတ်ႈဝႃႈၼႃႈတီႈသွၼ်ႉၵၼ် ၊ ဢၼ်ၶဝ်ဝႃႈၵူဝ်ၵူၼ်းမိူင်းလႆႈႁၢပ်ႇလၢႆမႃႇလၢႆၵၢၼ်းၼၼ်ႉ ၵူၼ်းမိူင်းလႆႈသႂ်ႇၶွၼ်ႇပၼ်ၵူႈမူႇၵူႈၸုမ်းဢၼ်ပဵၼ်ဢူၺ်းလီၶဝ်ၼၼ်ႉ လႄႈ ၶဝ်ၵေႃႈဢမ်ႇႁတ်းတၵ်းသဵင်သင်။
ၸုမ်းၶဝ်ယွၼ်းၵိၼ်ၶဝ်ၵူၼ်းမိူင်းတႆးသေ ဢဝ်ၸုမ်းဢူၺ်းလီၶဝ်မႃးယွၼ်းၵိၼ်ၶဝ်ၵူၼ်းၶိူဝ်းတႆးသေသမ်ႉဢွၼ်ၵၼ်လမ်းတိုၵ်းၶိုၼ်းသိုၵ်းတႆးၼင်ႇၵၼ် ႁူမ်ႈၸွမ်းဢူၺ်းလီၶဝ်သေပေႉၵိၼ်ၵူၼ်းၶိူဝ်းတႆးၼင်ႇၵၼ်ပေႃးတၢၼ်ႇဝႃႈၸုမ်းၶဝ်ဢမ်ႇၸႂ်ႈတႆးယဝ်ႉ။
