ၶႅပ်းႁၢင်ႈမိူဝ်ႈၸဵတ်းပီႊပူၼ်ႉမႃး 2014
ၽူႈၼမ်းတႆးႁူပ်ႉထူပ်းပီႈၼွင်ႉတႆးယၢၼ်မိူင်မိူဝ်ႈဝၼ်းပွႆးဢွၵ်ႇဝႃႇတီႈဝတ်ႉၵူႇတဝ်ႈၵဵင်းမႂ်ႇလႄႈႁူမ်ႈလူႇတၢၼ်းပၼ်ၵူၼ်းမိူင်းၸိူဝ်းၺႃးၸၢၵ်ႇလွင်ႈသိုၵ်းမၢၼ်ႈလေႃႇတိုၵ်းတပ်ႉသိုၵ်းတႆးလႄႈလူႇတၢၼ်းပၼ်ၵေႃႉသိုၵ်းၸိူဝ်းလႆႈလူႇသၢႆၸႂ်တႃႇၸိူဝ်ႉၸၢတ်ႈဝၢၼ်ႈမိူင်းၵႂႃႇၼႂ်းပၢင်တိုၵ်း တီႈဝဵင်းၵဵင်းမႆႇၸိုင်ႈထႆးမိူဝ်ႈပီႊ 2014
မိူဝ်ႈပူၼ်ႉမႃးၼၼ်ႉပီႈၼွင်ႉတႆးၼႂ်းမိူင်းလႄႈ ၼွၵ်ႈမိူင်းဢၼ်ၵၼ်ပၼ်ႁႅင်းၸုမ်းတႆးၵူႈၸုမ်း ဢမ်ႇမီးလွၵ်ႈၸတ်ႉတႅၵ်ႇငၢၵ်ႈၼႂ်းတႆးၼင်ႇၵၼ် ဢမ်ႇမီးလွင်ႈပႅင်းၸင်းၵၼ် ဢမ်ႇမီးလွင်ႈသေႉၼေးၵၼ်
ၵူၼ်းမိူင်းလႄႈၸဝ်ႈသင်ႇႃႇရႁၢၼ်းၶဝ်တုၵ်းယွၼ်းႁႂ်ႈၸုမ်းတႆးၵူႈမူႇၵူႈၸုမ်းႁႂ်ႈၽွမ်ႉႁူမ်ႈပဵၼ်မူႇၼိုင်ႈၸုမ်းလဵဝ်
တုၵ်းယွၼ်းႁႂ်ႈၸုမ်းပႃႇတီႇၵၢၼ်မိူင်းတႆး သွင် ၸုမ်းၽွမ်ႉႁူမ်ႈၵၼ်ပဵၼ်ၸုမ်းလဵဝ် ယႃႇႁႂ်ႈတႆးႁဝ်းႁဝ်းလႆႈႁိမ်ၶႅပ်းၵၢင်ၸႂ်ၵၼ် ၊ ၵူၺ်းၵႃႈလင်ႈဢၼ်ၵူၼ်းမိူင်းမုင်ႈမွင်းၼၼ်ႉၵေႃႈဢမ်ႇပဵၼ်မႃးလႆႈသေ ႁဵတ်ႈႁႂ်ႈပႃႇတီႇတႆးႁဝ်းသုမ်းပၼ်ပႃႇတီႇပိူၼ်ႈတၢင်းၼမ် ႁၼ်ၵၼ်ယူႇတႂ်ႈတႃ ။
လွင်ႈတပ်ႉသိုၵ်းတႆးၵေႃႈမိူၼ်ၵၼ် ၵူၼ်းမိူင်းတုၵ်းယွၼ်းႁႂ်ႈႁူမ်ႈပွင်းၵၼ်ႁႂ်ႈပဵၼ်မူႇၼိုင်ႈၸုမ်းလဵဝ်ၵၼ်ၼႆသေတႃႉဢမ်ႇပဵၼ်မႃးလႆႈၼင်ႇၵၢင်ၸႂ်ၵူၼ်းမိူင်းလႃးလႃး။
ပေႃးတေႇႁႃဢုပ်ႇၵၼ်ၵေႃႈ ၸုမ်းၼိုင်ႈသမ်ႉဢဝ်ၼႃႈတီႈပဵၼ်ယႂ်ႇ ႁႂ်ႈထႅင်ႈၽၢႆႇၼိုင်ႈထွၼ်သိုၵ်းဢွၵ်ႇပိုၼ်ႉတီႈမူတ်းယဝ်ႉၸွင်ႇဢုပ်ႇၵၼ်ၼႆယူႇ ၊ ပေႃးဢၢၼ်းၶႂ်ႈႁူမ်ႈၵၼ်ယူႇတႄႉ သင်ဝႃႈႁူမ်ႈၵၼ်ယဝ်ႉမၼ်းၵေႃႈပဵၼ်ဢၼ်လဵဝ်ၵၼ်မူတ်းယဝ်ႉ ၊ မၼ်းၵေႃႈပဵၼ်ၼႃႈတီႈၸုမ်းလဵဝ်ၵၼ်ယူႇယဝ်ႉ ဢမ်ႇႁူႉဝႃႈတေလႆႈထွႆယွၼ်ႉသင် ၊ သမ်ႉပၢႆၼေးၵူၼ်းမိူင်းဝႃႈၵူၼ်းၸပ်းၽၢၵ်ႇၼႆပၼ်ၵူၼ်းမိူင်းထႅင်ႈလူးၵွၼ်ႇ။
မိူဝ်ႈမီးသိုၵ်းလၢႆၸုမ်း မၼ်းတိုၼ်းမီးၵူၼ်းမိူင်းလၢႆၽၢၵ်ႇယူႇယဝ်ႉ ၼႆႉပဵၼ်ပိူင်သၽႃႇဝမၼ်းယဝ်ႉ
လႄႈလွင်ႈသေႉၼေးၵၼ်ၵေႃႈၸုမ်းၵဝ်ၸုမ်းမႂ်းၼၼ်ႉၵေႃႈတိုၼ်းဝေႈဢမ်ႇလွတ်ႈ ။
ထႅင်ႈၽၢႆႇၼိုင်ႈသမ်ႉဢူၼ်ႈၼွမ်းၶဝ်ႈႁႃၵူၼ်းမိူင်းၼင်ႇႁိုဝ်ၵူၼ်းမိူင်းတေပွင်ႇၸႂ်လွင်ႈၼႃႈၵၢၼ်ၶဝ်ၼႆသေၶတ်းၸႂ်ၵႂႃႇၵူႈတီႈတီႈလႂ်ၵူၼ်းမိူင်းတုၵ်းယွၼ်းႁႂ်ႈၽဵဝ်ႈယႃႈမဝ်းၵမ် ၼင်ႇႁိုဝ်ၵူၼ်းၼုမ်ႇႁုၼ်ႈမႂ်ႇတႆးႁဝ်းပေႃႈတေႁၢင်ႇၵႆယႃႈမဝ်းၵမ်ၼၼ်ႉၶတ်းၸႂ်ယူႇတႃႇသေႇ
ၵွပ်ႈၽဵဝ်ႈယႃႈမဝ်းၵမ်သေပီႈၼွင်ႉၵူၼ်းမိူင်းၵမ်ႉထႅမ်ပၼ်ႁႅင်းၸုမ်းၶဝ် လႄႈၸုမ်းၶဝ်ယိုၼ်ႈမိုဝ်းၸူးၵူႈမူႇၵူႈၸုမ်းႁူမ်ႈမိုဝ်းၵၼ်ၽဵဝ်ႈယႃႈမဝ်းၵမ်ၼႆသေတႃႉ လႆႈထုၵ်ႇပၢၵ်ႈပႅတ်ႈတႃႇသေႇ။
ၵွပ်ႈၽၢႆႇၼိုင်ႈႁဵတ်းၵၢၼ်မၢၵ်ႈမီးဢၼ်ၵဵဝ်ႇၶွင်ႈယႃႈမဝ်းၵမ် ထႅင်ႈၽၢႆၼိုင်ႈသမ်ႉသိမ်းပႅတ်ႈ ၽဵဝ်ႈပႅတ်ႈလႄႈ ပၼ်တၢမ်ႇၵူၼ်းၵိၼ် ၵူၼ်းၵႃႉၵူၼ်းၶၢႆမၼ်းလႄႈ လွင်ႈထၢင်ႇၽိတ်းထၢင်ႇပိူင်ႈၵၼ်ၼႂ်းၸုမ်းၼိုင်ႈလႄႈၸုမ်းၼိုင်ႈၵေႃႈမီးမႃးယဝ်ႉ။
ၵွပ်ႈပိူဝ်ႈဢဝ်ၸိူဝ်ႉၸၢတ်ႈဝၢၼ်ႈမိူင်းပဵၼ်ယႂ်ႇလႄႈ လွင်ႈဢၼ်ၸၢင်ႈတုမ်ႉတိူဝ်ႉၵူၼ်းမိူင်းၼၼ်ႉၵႃႈလႆႈႁႃတၢင်းၵႅတ်ႇၶေပၼ်ၵူၼ်းမိူင်း ပေႃးၵူၼ်းမိူင်းၸပ်းယိၼ်ႉယႃႈမဝ်းၵမ်ၸၢင်ႈႁဵတ်းႁႂ်ႈဝၢၼ်ႈမိူင်းဢမ်ႇၶိုၼ်ႈယႂ်ႇ တေႁဵတ်းႁႂ်ႈၵူၼ်းမိူင်းၵွတ်းၽၢၼ် ပဵၼ်ၵူၼ်းတူၵ်းတႅမ်ႇၼႆတိုၼ်းၸႅင်းလႅင်းယူႇယဝ်ႉ။
လွင်ႈဢၼ်ၵူၼ်းမိူင်းတုၵ်းယွၼ်းႁႂ်ႈဢုပ်ႇဢူဝ်း ႁူမ်ႈႁွမ်းၵၼ်ၼၼ်ႉၵေႃႈဢမ်ႇပဵၼ်မႃးလႆႈၼင်ႇၵၢင်ၸႂ်
ယွၼ်ႉပေႃးႁႃဢုပ်ႇၵၼ်ၵေႃႈၽၢႆႇၼိုင်ႈၵုမ်ႇၸႂ်ႉထွႆဢွၵ်ႇပိုၼ်ႉတီႈဢွၼ်တၢင်းယဝ်ႉၸင်ႇဢုပ်ႇၵၼ်ၼႆလႄႈပဵၼ်ဢၼ်ဝူၼ်ႉဢမ်ႇပွင်ႇယူႇယဝ်ႉ။
ထႅင်ႈၽၢႆႇၼိုင်ႈသမ်ႉဢဝ်ၸိူဝ်ႉၸၢတ်ႈဝၢၼ်ႈမိူင်းပဵၼ်ယႂ်ႇလႄႈ ပေႃးဢုပ်ႇၵၼ်ယဝ်ႉၸင်ႇၵွႆႈထွႆၼႆယူႇ
မိူဝ်ႈႁူမ်ႈၵၼ်ပဵၼ်မူႇၼိုင်ႈၸုမ်းလဵဝ်ယဝ်ႉ ၽႂ်ဢဝ်ပုၼ်ႈၽွၼ်တီႈလႂ်ၵေႃလႆႈၼႆယူႇ။
ၵူၺ်းၵႃႈမိူဝ်ႈလဵဝ်ၶၢဝ်းယၢမ်းၵေႃႈပူၼ်ႉမႃးႁိုင်ယဝ်ႉ လွင်ႈဢုပ်ႇဢူဝ်းတႃႇၽွမ်ႇၵၼ်ၵေႃႈဢမ်ႇပဵၼ်မႃးသေမဝ်ႇၵႃးသမ်ႉပၢႆဝၢႆႇပၢၵ်ႇၵွင်ႈယိုဝ်းၵၼ်ၶိုၼ်းႁၢဝ်ႈႁဝ်ႈႁႅင်းႁႅင်း ၊ လွင်ႈၶွတ်ႇလိူတ်ႈၽွမ်ႉၵၼ်ၼၼ်ႉယိုင်ႈၶႅၼ်းယၢၼ်ၵႆၵႃႇတိၵ်းယဝ်ႉ။
လွင်ႈဢၼ်တႆးဢမ်ႇႁူမ်ႈႁမ်းၽွမ်ႉၵၼ်လႆႈၼၼ်ႉပဵၼ်ယွၼ်ႉလွင်ႈသင်
ပဵၼ်ယွၼ်ႉပိူဝ်ႈပိူၼ်ႈႁ ပဵၼ်ယွၼ်ႉတႆးႁဝ်းၼင်ႇၵၼ် ၊ ၵွပ်ႈတႆးႁဝ်းမီးမူႇၵဝ်ၸုမ်းမႂ်းၼမ်ၼႃႇလႄႈ ၶဝ်ႈလွၵ်းပိူၼ်ႈၼႆႁိုဝ် ၊ ယွၼ်ႉၵၢၼ်ပၢႆးမၢၵ်ႈမီးသုၼ်ႇတူဝ်ႁိုဝ် ၊ ယွၼ်ႉဢဝ်ၵူၼ်းၼွၵ်ႈၶိူဝ်းပဵၼ်ယႂ်ႇၼႂ်းၸုမ်းႁိုဝ် ၊ ဢမ်ႇၼၼ် မီးၸုမ်းဢၼ်ၶႂ်ႈသၢၼ်ၶတ်းၶႂ်ႈယႃႉႁႂ်ႈတႆးႁဝ်းတႅၵ်ႇငၢၵ်ႈၵၼ်ၼၼ်ႉၸမ်းသေႇယႃႉၵဝ်းၽၢႆႇလင်ၸုမ်းလႂ်ၸုမ်းၼိုင်ႁိုဝ် ၊ ဢမ်ႇၼၼ်ၵေႃၵဵင်ၸႂ်ဢၢၼ်းၼႃႇဢူၺ်းၵေႃႉဢူၺ်းလီၼႃႇပူၼ်ႉလႄႈ ၵၢၼ်ၽမ်ႉႁူမ်ႈၼႂ်းတႆးႁဝ်းတင်ပဵၼ်မၼ် ၊ ၵုမ်ႇႁဵတ်းၵႃၼေးၵဝ်ႉ ၵဝ်ႉၼေးၵႃ ယူႇတေႃႇထိုင်ယၢမ်းလဵဝ်။
